Oiponga yomeendjila oya twaalela eemwenyodihapu dovanyasha – MVA Fund

0 186

Omukulunhuwiliki wehangano li na sha noiponga yomeendjila ledina Motor Automobile Accident (MVA) Fund, Rosalia Martins-Hausiku okwa ti omwaalu woiponga yomeendjila ya kwatela mo ovanyasha okudja peedula 18 fiyo 35 ou li tau kumwifa natango moNamibia.

Hausiku eshi okwe shi popya Etitano la dja ko pefimbo kwa li ta popi novatoolinghundana.

Okwa ti omwaalu woiponga yomeendjila ya kwatela mo ovanyasha odula ya dja ko okwa li u li pombada neenghono.

Martins-Hausiku okwa ti Namibia ota twikile nokukanifa ovanyasha, ovanhu ve na oshilonga peedula davo dopetameko medina loiponga yomendjila.

Eshi osha kuma eliko loshilongo neenghono, osho a ti ngaho.

Omwaalu woiponga wa ongelwa koMVA Fund owa yandja kutya momudo 2023 oitopolwahoolo oyo kwa li i na oiponga i li pombada okwa li Khomas, Erongo, Oshana, Otjozozupa nOshikoto.

Eyelakanifo pokati komudo 2022 nomudo 2023 ola ulika kutya oshitopolwahoolo shaKavango Uninginino osha ya pombada neepelesenda 50 moiponga yomeendjila, sha landulwa koshitopolwa shaKunene, neepelesenda di li lwopo42. Oshinima shimwe tashi udifa nawa, oiponga yomendjila oyo mwa kwatelwa ovanyasha okudja peedula 18 fiyo 35 moshitopolwahoololo shaHangwena oya shuna pedu neepelesenda 27 pefimbo olo tuu olo.

“Omalemano, oitopolwahoololo oyo ina omwaalu woiponga u li pombada oyo ngaa natango i li pombada komalemano a etwa koiponga yeehauto.

“Omaheke aa didilika omalemano oiponga yomendjila ya kwatela mo ovanhu veedula odo da tumbulwa nale momudo 2022 fiyo 2023 u li peepelesenda 34, kwa shikula Omusati u na eepelesenda 33, omanga omwaalu woKavongo Usilo wa wa pedu neepelesenda 20 domalemano.

Omalemano aeshe kumwe okwa ya pombada nopelesenda 1 okudja momudo 2022 fiyo 2023,” Martins- Hausiku osho a ti ngaho.

Okwa ti kutya eyelakanifo pokati ko2022 no2023 ola ulika kutya oshitopolwa shaShikoto osha ya pombada neepelesenda 38, omanga oKavango Usilo ka ulika eshuno pedu momafyo oiponga yomeendjila neepelesenda 56. “Oshinima shimwe shiwa, omafyo okwa li a shuna pedu neepelesenda 22 pokati ko2022 no2023.

“Omwaalu wovalumenhu, omafyo nomalemano, oo u li pombada unene mwaavo va ya moiponga yomeendjila.

“Pefimbo olo kwa li kwa ningwa omatalululo kombinga yeedula 18 fiyo 35, okwa li kwa didilikwa kutya, ovakulukadi ovo kwa li va ningwa oihakanwa yoiponga yomeendjila eshi ve li peepelesenda 36, omanga ovalumenhu nande ovo hava i moiponga luhapu, omwaalu wavo wa shuna pedu neepelesenda 19,” Osho a ti ngaho.

“Oiponga yomeendjila movanyasha ihai eta ashike ekanifo leemwenyo, ashike natango ohai eta oupyakadi keliko loshilongo.

“Keshe oshiponga ohashi pula sha, nda dini okutumbula oululume wopanghalafano waavo va shaala po naavo tava tonatele ovo va lemana.

“Oluhodi nokumona oixuna kwofamili nako okuna oupyakadi wa kula koshiwana,” Martins-Hausiku osho a ti ngaho.

Okwa ti oshikefa shavo ohashi longifa oshimaliwa shi fike peemiliyona omafele avali kodula mokupangifa oonakuninga oihakanwa.

Eedula odo fiyo onena, oshikefa osha longifa eemiliyona 168 mouhaku neemiliyona 72 momapako, mekanifo loiyemo neyambidido lofamili.

Martins-Hausiku okwa ti oshikefa osha mona kutya oiponga ohai ningwa unene momaxulilo shivike, nEtitatu otali ulike omwaalu tau i pombada.

“Eepelesenda 72 deetuwa dopaumwene okwa li da ninga oiponga momudo 2023, omanga eepelesenda 10 eetuwa depangalo, eepelesenda 20 edi da shaala ko eetuwa dovanambelewa,” Osho a ti ngaho.

Martins-Hausiku okwa ti oyeendifo 4 065 okwa li ya ninga oiponga moNamibia pefimbo olo tali popiwa, ashike omwaalu okwa li wa shuna pedu neepelesenda 3 mo2022.

Eepelesenda 45 deetuwa odo da ninga oiponga okwa li outuukala, omanga eepelesenda 31 okwa li eebaki.

Martins-Hausiku okwa ti elongelokumwe pokati koikandjo aishe ya kwatelwa moshinima eshi ola xwepopala, osho tashi eta oindjemo iwa neenghono paife, ashike nee, opwa pumbwa okuningwa shihapu natango opo kuxwepopalekwe oiponga yomeendjila, “shaashi omwenyo umwe wa kanifwa omwenyo umwe kuvahapu”.

“Otwa pumbwa lela okuninga eameno lomeendjila oshinakuwanifa shopaumwene opo tu kwashilipaleke kutya eemwenyo dovanyasha novalongifi veepate oda amenwa,” Osho a ti ngaho.

Keep knowledgeable with The Namibian – your supply for credible journalism. Get in-depth reporting and opinions for
solely N$85 a month. Put money into journalism, spend money on democracy –
Subscribe Now!

Supply: namibian

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More